وزارت خارجه‌ تاجیکستان از حمله مسلحانه از خاک افغانستان به ولایت ختلان آن کشور خبر داده و گفته است که در این حمله سه شهروند چینی که در یک شرکت خصوصی کار می‌کرد، کشته شدند.
به گزارش شفقنا، وزارت خارجه‌ تاجیکستان، روز (پنج‌شنبه، ۶ قوس) در بیانیه‌ای گفته که این حمله شب گذشته با استفاده از اسلحه و یک پهپاد مجهز به نارنجک انجام شده است.
براساس بیانیه، هدف این حمله مقر کارکنان یک شرکت خصوصی به نام «شاهین» بوده است.

وزارت خارجه تاجیکستان ضمن تقبیح این حمله، از طالبان خواسته است اقدامات مؤثری برای تضمین ثبات و امنیت مرزی انجام دهند.
وزارت خارجه تاجیکستان افزوده است که با وجود تلاش‌های مستمر دوشنبه برای حفظ امنیت و ایجاد صلح و ثبات در مناطق مرزی بین افغانستان و تاجیکستان، اقدامات مختل‌کننده گروه‌های «جنایت‌کار مستقر در افغانستان» همچنان ادامه دارد.

این وزارت در بیانیه‌ای ادعا شده که این حمله از خاک افغانستان بر مرکز یک شرکت استخراج معادن طلا در ولایت ختلان در تاجیکستان صورت گرفته است.
در بیانیه آمده است که این حمله با استفاده از «واسطۀ هوایی بی‌سرنشین» انجام شده است.
در ادامه گفته شده است که با وجود تلاش‌های پیوستهٔ تاجیکستان برای تأمین امنیت و ایجاد فضای صلح و ثبات در مناطق مرزی میان تاجیکستان و افغانستان، اقدامات اخلال‌گرانهٔ گروه‌های جنایی مستقر در خاک افغانستان همچنان ادامه دارد.
در اعلامیه از مقامات طالبان خواسته شده است که تدابیر موثر برای تامین ثبات و امنیت در مرز میان این دو کشور روی دست بگیرند.

در سایت رادیو ازادی آمده است، این در حالی است که یک هیات حکومت طالبان به تاجیکستان رفته و با شمارى از مقام‌های مرزی آن کشور دربارهٔ وضعیت امنیتی مرز میان افغانستان و تاجیکستان گفتگو کرده.
این را وزارت داخلهٔ حکومت طالبان امروز در یک اعلامیه گفت و افزود که این هیئت به رهبری محمد اسماعیل غزنوی، والی بدخشان، با والی «کوهستان بدخشان» تاجیکستان نیز دیدار کرده.
تاجیکستان بارها دربارهٔ امنیت مرز خود با افغانستان ابراز نگرانی کرده، اما در ماه‌های اخیر تماس‌هایش با مقام‌های طالبان افزایش یافته است.
در ۱۵ نومبر امسال، هیات متشکل از دیپلمات‌ها و مقامات ارشد امنیتی تاجیکستان برای گفت‌وگو با مقامات طالبان وارد کابل شد.

گفتنی است که تا کنون هیچ گروهی مسوولیت این حمله را بر عهده نگرفته و طالبان نیز در این مورد اظهار نظر نکرده‌اند.
این رویداد در حالی صورت گرفته است که بسیاری از سازمان‌های بین‌المللی و کشورها معتقدند که گروه‌های شبه‌نظامی فعال در افغانستان، بزرگ‌ترین تهدید برای آسیای مرکزی هستند.

کد (9)