محمد یوسف وفا نماینده ویژه رهبر طالبان و والی بلخ، برای نخستین بار برای شرکت در نشست مشترک با وزارت سرحدات تاجیکستان به دوشنبه، پایتخت این کشور، سفر کرد. نشست مشترک با وزارت مرزهای تاجیکستان در شهر دوشنبه برگزار شد و مقامات ارشد نظامی و امنیتی تاجیکستان از جمله خورشید عطازاده، فرمانده مرزها و سیدمومن ستاراویچ، وزیر اطلاعات، در آن حضور داشتند.

وفا در این دیدار ضمن تأکید بر گسترش روابط دیپلماتیک، فرهنگی، اقتصادی و علمی میان کابل و دوشنبه، مبارزه مشترک با تهدیدات امنیتی را اولویت همکاری‌های دوجانبه دانست.
او همچنین خواستار هماهنگی عملیاتی در مقابله با گروه‌های تروریستی و شبکه‌های قاچاق مواد مخدر شد.
در مقابل، وزیر اطلاعات تاجیکستان با استقبال از مواضع طرف افغانستانی، بر اهمیت حفظ حسن هم‌جواری و توسعه همکاری‌های امنیتی و اطلاعاتی میان دو کشور تأکید کرد.
این سفر به دعوت دولت تاجیکستان و با حضور هیأت بلندپایه طالبان انجام شده است.

تاجیکستان نیز در گذشته از فعالیت جنگجویان مخالف خود در مناطق مرزی افغانستان ابراز نگرانی کرده بود. این کشور تنها کشوری در آسیای مرکزی است که تاکنون روابط نزدیکی با حکومت طالبان برقرار نکرده است.

کد (9)